BİR "BAŞIQAPAZLI"NIN SÖYLӘNMӘYİ

Bizim adımız başıqapazlıdır. Ya budur ki, gәrәk biz evdәn bayıra çıxmayaq, ya ki, çıxsaq da, hәr tәrәfdәn qapaz yemәyi gözümüzün önünә alaq. Bilet alıb vaqona minirik, konduktor qapaz vurub deyir ki, nә üçün bilet alıb mәni rüşvәtdәn mәhrum edibsәn? Bilet almayıb vaqona minirik, yenә konduktor qapaz vurub deyir ki, nә üçün biletsiz gedirsәn? Sonra da tutub cibimizi soyur.

Şәhәr vә kәnd müәssisә (uçrejdeniye)lәrinin qapısında biz hәmişә boynuburuq vә әli qoynunda durub hәftәlәrlә növbәt gözlәyirik. Axırda da "zavtra" ilә bir qapaz alıb, mәyus gedirik.

Ürәyimizin qәmini dağıdıb әhvalımızın pәrişanlığını düzәltmәk niyyәtilә "bulvar" vә "sad" deyilәn tәfәrrücgahlara çıxırıq, qaradavoy qapaz vurub, bayıra çıxardır ki, bura sizin yeriniz deyil.

Tamaşa üçün teatrlara gedirik, pulla da bizә bilet vermirlәr. Görünür ki, ora dәxi bizim yerimiz deyil.

Küçәlәrdә gәzmәk bizim üçün xatadır. Sübh vaxtı qabağımıza çıxan adam bizi görüb, geri çәklir ki, "tfu", mәnhus adama rast gәldim. İşim düz kәtirmәyәcәk". Axşamçağılarda da bizi qaradavoy vә strajniklәr soymasa, quldurlar soyur. Dilәnçilәr dә bizi görüb, tәkәbbür satırlar. İtlәr dә hәr yerdә tәk bizә hürür, uşaqlar da bizә sataşır. Guya ki, biz bu dünyaya gәlmәkdә bir xәta etmişik (....).