BİZ MÜSӘLMANLARDA ŞİRKӘT
Biz müsәlmanlarda şirkәt, kompaniya
vә bunun kimi şeylәr çox az әmәlә
gәlir vә әmәlә gәlsә dә
çox vaxt heç işә başlamamış
dağılıb, şirkәtin üzvlәri bir-birini
görәndә bir verstlikdәn qaçırlar.
Müsәlmana deyirsәn ki, balam, gәl bir
nәşriyyat cәmiyyәti quraq; hәm
özümüz pul qazanaq hәm özgәyә pul
qazandıraq vә hәm dә camaatımızın
arasına savad artıraq.
Müsәlman bir qәdәr fikir elәyir
vә bir balaca gülümsünür vә sonra deyir:
-- Axı pulum yoxdur.
Sәn bu sözә inanmırsan,
çünki bilirsәn ki müsәlmanın cibindә
elә bu saatın özündә bir әlli manat var ki,
üzvlük payı üçün bәsdir vә
özü dә elә yerlәrә әlli manat
xәrclәyir min il çalışsa, o yerdәn
әlli qәpiklik dә mәnfәәt görmәz.
Bunu deyirsәn, yenә bir az fikir elәyir vә deyir:
-- Axı sәn bilmirsәn ki, әlli
manatın әlli min dәrdi var?
Bu sözün qabağına heç bir
söz deyә bilmirsәn. Doğrudan da, әlli manatın
әlli min dәrdi var. Ancaq başlayırsan
qandırmağa ki, bu әlli manat itmir. Bәlkә
iki-üç onu kimi әlli manat götürülüb
yüz min şeyin dәrdinә dәrman olur.
Müsәlman inanmaq istәmir vә soruşur:
-- Yәni nә tәhәr?
Deyәrsәn ki, mәsәlәn, birisi
bir kitab yazır vә istәyir ki, o kitabı çap
etdirsin, amma pulu olmur. Gәlir nәşriyyat
cәmiyyәtinin yanına vә kitabını o
cәmiyyәtә satır. Cәmiyyәt kitabı
alıb çap etdirib, satmağa başlayır. Satıb qurtarandan
sonra görür ki, filan qәdәr mәnfәәt
elәyibdir vә mәnfәәti dә
üzvlәrinin arasında paylayır.
Müsәlman bu sözlәrә qulaq
asır vә deyir:
-- Bәlkә kitablar satılmadı?
Onda deyirsәn ki, yaxşı, bәs onda
sәn heç dükana corab alıb qoyma. Deyir: "Nә
üçün?" Deyirsәn ki, bәlkә corablar
satılmadı. Müsәlman gülür vә deyir:
-- Axı, corabla kitab bir deyildir! Corabı yenә ayağa geyirlәr, kitabı nә elәsinlәr?
İş bu mәqama gәldikdә sәn özgә bir fikrә gedirsәn vә baxıb görürsәn ki, bu cürә üzvlәrdәn nәşriyyat cәmiyyәti düzәltmәk ona oxşar ki, palçıqdan iki mәrtәbә ev tikәsәn ki, sonra da uçub tökülәndә altında qalan sәn olasan. Ayağa durub, xudahafiz deyib gedirsәn....