GETMӘYİN MӘSLӘHӘTDİR
-- Әşi, allaha and olsun, yol açılan
kimi çıxıb gedib ya Rusiyyetdә, ya zaqranitsada
qalıb, bir kәrә dә üzümü Bakıya
çevirmәyәcәyәm!
-- Balam, nә olubdur?
-- Nә olacaq! Studentlik vaxtımızda bir o qәdәr yaxşılıq elәmişәm, pulu
olmayanda pul vermişәm, neçә kәrә teatrlara aparmışam, evimdә yer verib saxlamışam, indi özü ministr olubdur, mәnә deyir ki, sәni qubernat tәyin elәyim! Yәni,
aşağı-aşağı, qatqalaşdan da
aşağı?! Neujeli, mәn o qәdәr әskik oldum ki, ancaq
qubernatorluğa layiqәm?!
-- Әfәndi, Nikolay vaxtında min cürә yaltaqlıq, rüşvәt peşkәşdәn sonra birimizә pristavlıq verilәndә elә bilirdik ki, bütün dünya bizә verildi, indi nә oldu, ki, qubernatorluq әskik iş oldu?
-- Xeyir, mәn demirәm
ki, qubernatorluq әskik şeydir. Siz,
görünür ki, mәni başa düşmәdiniz! Mәn onu deyirәm ki, indi ki, mәn sәnә studentlik vaxtında bir o qәdәr yaxşılıq elәmişәm, neçә kәrә pul da vermişәm vә sәn mәnim yoldaşım idin, bu gün sәn ki, pristav olmusan, mәni dә heç olmasa, pamoşnik pristava elә! Qubernat olmusan, pomoşnik
qubernat elә!
Ministr olmusan, heç olmasa, tovariş ministra elә! Daha elә olmasın ki, sәn olasan ministr, mәn nә? Qubernat! Mәn bunu
demәk istәyirәm.
-- Hә, siz bunu demәk istәyirmişsiniz? Elә isә, bu başqa mәsәlәdir! İnşallah,
yol açılanda çıxıb getmәyiniz mәslәhәtdir.