İRANIN EVİ YIXILIB

-- Sabahın xeyir olsun, Kәrbәlayi Qulu!

-- Aqibәtin xeyir olsun, Mәşәdi Nәbi!

-- Bilirsәn, nә var?

-- Yox, necә?

-- İranda azadlıq verilibdir.

-- Hә, bir elә әhval eşitmişәm, ancaq azadlıq, yәni

nә olsun?

-- Azadlıq odur ki, İranda indәn belә hambaldan tutmuş vәzirә kimi bir mәclis qurub, dövlәt işinә mәslәhәt vә mәşvәrәtlә baxacaqdılar.

-- Pәh, deynәn İranın evi yıxılıbdır da!

-- Necә?!

-- Әşi, bir mәclisdә ki, hambal vәzirlә söhbәt edәcәkdir, o mәclisdәn nә yaxşı şey gözlәmәk olar?!

-- Keyfin yaxşıdırmı, Kәrbәlayi Qurquşum?

-- Keyfin yaxşı olsun, usta Hәsәn?

-- Eşitdinmi İranda nә olubdur?

-- Yox, nә olubdur?

-- Pәh, İranda azadlıq verilibdir!

-- Yәni nә olacaqdır?

-- O olacaqdır ki, bundan sonra hambal vәzir ilәn bir

yerdә mәclis qurub, söhbәt edәcәkdir!

-- Bu yaxşı olmadı, usta Hәsәn!

-- Neyçün?

-- Әşi, bir hambal ki, vәzir ilәn dizbir olub söhbәt elәyә, sonra gәlib on put arpanı iki köpük manata şәhәrin o başınadәk aparmağa razı olarmı?

AND İÇMӘK

-- Kәrbәlayı Nәcәfqulu, saat neçәdir?

-- Dәstәdәn on iki dәqiqә keçibdir.

-- Ba?!

-- Әbülfәzl Abbas haqqı.

-- Mәşәdi Hәsәn, dünәn sәn dә qonaqlıqda idin?

-- Yox, Hәzrәt Abbasın qәlәm edilәn qolları haqqı!

-- Molla Vәli, bilirsәn dünәn Nәcәfәli bәyә nә dedim?

-- Nә dedin!

-- Dedim: Әlinin qәzәb oğlu Hәzrәt Abbas mәnә qәnimolsun yalan deyirәmsә, bu saat qarnuvu yarıb tüstü ilә dolduraram.

-- Deyinәn, sәn öl!

-- Sәn öl! Hәzrәt Abbas belimdәn vursun ki!

-- Kәrbәlayı Hümmәt, mәnim başmaqlarımı sәn geyibsәn?

-- Yox, Hәzrәt Abbasın bir cüt düşәn qolları haqqı!

-- A kişi, ta niyә yalandan and içirsәn. Budur, ana, mәnim başmaqlarım sәndәdir.

--Buy, Hәzrәt Abbasın qılıncına gәlim ki, elә bilirdim özümündür!!