QARI VӘ PİŞİK

Bir gün bir qarı inәyini apardı suvarmağa. İnәyin ayağı buzun üstündәn sürüşüb yıxıldı vә qıçı sındı. Onda qarı buza dedi:

“A buz, sәn nә güclüsәn?”

Buz cavabında dedi:

“Әgәr mәn güclü olsaydım, gün mәni әritmәzdi.”

Qarı dedi:

“A gün, sәn nә güclüsәn?”

Gün cavabında dedi:

“Әgәr mәn güclü olsaydım, bulud qabağımı kәsmәzdi.”

Qarı dedi:

“A bulud, sәn nә güclüsәn?”

Bulud dedi:

“Mәn güclü olsaydım, yağış mәndәn yağmazdı!”

Qarı dedi:

“A yağış, sәn nә güclüsәn?”

Yağış dedi:

“Әgәr mәn güclü olsaydım, ot mәndәn bitmәzdi.”

Qarı dedi:

“A ot, sәn nә güclüsәn?”

Ot dedi:

“Mәn güclü olsaydım, qoyun mәni yemәzdi!”

Qarı dedi:

“A qoyun, sәn nә güclüsәn?”

Qoyun dedi:

“Әgәr mәn güclü olsaydım, qurd mәni yemәzdi!”

Qarı dedi:

“A qurd, sәn nә güclüsәn?”

Qurd dedi:

“Mәn güclü olsaydım, it mәni boğmazdı.”

Qarı dedi:

“A it, sәn nә güclüsәn?”

İt dedi:

“Mәn güclü olsaydım, çoban mәni döymәzdi.”

Qarı dedi:

“A çoban, sәn nә güclüsәn?”

Çoban dedi:

“Mәn güclü olsaydım, xanım mәni söymәzdi.”

Qarı dedi:

“A xanım, sәn nә güclüsәn?”

Xanım dedi:

“Әgәr mәn güclü olsaydım, siçan torbalarımı kәsmәzdi.”

Qarı dedi:

“A siçan, sәn nә güclüsәn?”

Siçan dedi:

“Әgәr mәn güclü olsaydım, pişik mәni yemәzdi!”

Qarı dedi:

“A pişik, sәn nә güclüsәn?”

Pişik iki әllәrini qabağa, iki ayaqlarını dala qoyub, gәrdәnini çәkib, quyruğunu qalxızıb, gözlәrini bәrәldib, dilini çıxarıb, qarıya dedi:

Güclüyәm ha, güclüyәm,

Dәmir daraq dişliyәm.

Yük üstü yaylağımdır,

Yük altı qışlağımdır.

Kürsü üstә duraram,

Bığlarımı buraram....

M ә s ә l:

Siçan görәndә pәlәngә oxşayan pişik, pәlәng görәndә siçana dönәr.

T a p m a c a:

Taxçadan düşdü tap elәdi,

Gülsәnәm onu hap elәdi.