AĞABABA MӘŞHӘDİ ABDULLA OĞLU "ZÜHURİ"

Mәrhum Zühuri hәmçinin "Beytüs-Sәfa" calislәrindәn ziyadә üftadә vә batәvazö bir şәxs imiş. Tәvәllüd edibdir hicrәtin 1265-dә sәfәr ayının 11-ci günündә[1]. Tәlim alıbdır Şamaxı mәktәbindә. Türk lisanından masәva fars dilini vә farsların әdәbiyyatını kamil bilirmiş. Sәnәti müdәrrislik olubdur. Tәbi-şeriyyәsi sәri isә dә, çәndan mövzun deyildir.

[1] 6 yanvar 1849.

Mәrhum Zühuri hicrәtin 1310-cu[2] ilindә Şamaxıdan köçüb Badkubә şәhәrinә vә orada iki ilә qәdәr mәktәbdarlıq edib, bәdәn vәfat etmişdir. Özündәn sonra bir divani-qәzәliyyatı vә qәsaidi qalmışdır vә lakin o divan әlә düşmәdi.

[2] 1892.

Әşarından nümunә üçün Qarabağ şüәrasının nәzәri-tәnqidinә göndәrilmiş qәzәli burada yazılır:

Nә vәhşi könlüm ol ahunigәhdәn qeyrә ram olmaz,

Nә anın hicrinin nöqsan olan ayı tamam olmaz.

Muradım can fәda qılmaqdı yetcәk vәsli-cananә,

Әgәr hasil ola, eşq alәmindә böylә kam olmaz.

Sәfayi-vәslә yetdin, eylәyib çox sәylәr, ey dil,

Bәyan et birbәbir hicran qәmin, böylә mәqam olmaz.

Vüsali-yarә yetdin, bir әyağ tut, badә qıl hazir,

Dur, ey saqi, başınçun böylә dәm hәrgiz müdam olmaz.

Bu bәzmi-vәsl cәnnәt, saqisi qılmani-tubaqәd,

Mәni mәn etmә, zahid, mey behişt içrә hәram olmaz.

Gözün mәn etmәyә mülki-ruxindәn lәşkәri-xәtti

Edib müjganların sәf-sәf ki, dәva binizam olmaz.

Gәdalıq rәsmini tut kim, dәri-cananә yetmәkçün,

Zühuri, nәng qılma, aşiq üçün nәngü nam olmaz.