MİRZӘ KӘRİM "ŞÜAİ"

Mirzә Kәrim "Şüai" tәxәllüs әslәn Dәrbәndin cәnub tәrәfindәn--Kürә nahiyәsindә Üşdül qәryәsindәn İsrafil adında bir şәxsin oğludur. Mәzkur mahalda polkovnik Sultan Әhmәd bәy ki, o mahalın maliki-riqabı hesab olunurdu, Mirzә Kәrimi öz yanında müsәlmani mühәrrirliyinә götürüb, hәr yerә gedәndә öz yanınca aparardı. Hәtta Şeyx Şamilin davasında Mirzә Kәrimә әvvәlinci çin vә medal verdiribdir. Sonralardan mәzkur Sultan Әhmәd bәy Dәrbәnddә sakin olduğu üçün Mirzә Kәrimin atası İsrafil öz әhlü әyalı ilә köçüb Dәrbәndә gәlibdir vә orada cәnab polkovnikin zilli-himayәtindә dolanırdı. İttifaqәn Sultan Әhmәd bәy övzayi-zәmanәdәn tәngә әlib, özünü qәtlә yetirdi vә Mirzә Kәrim öz vәliyyün-nemәsinin qәtlindәn bir növ müttәhim olub Sibirә göndәrildi vә neçә illәr orada qalıb, imperaturi-әzәm tәrәfindәn fәrmani-humayun sadir olmağa görә, mürәxxәs olub, dübarә Dәrbәndә müraciәt elәdi. Artıq fәhmü zәkavәt sahibi olmağa görә, Rusiyada qaldığı zaman rusca oxumağı vә yazmağı lәyaqәtincә kәsb etmişdi. Sibirdәn qayıdandan sonra Dәrbәnddә nәcib familiyadan tәәhhül ixtiyar edib, әziz vә möhtәrәm şәxslәrdәn biri oldu vә mәhәllә rәisi (kvartalnı) mәnsәbinә nail olub, xoş güzәran edәrdi vә sakin olduğu mәhәllәnin şәbih ümuratına mübaşir olub, mәscidi-camedә şәbih gәtirmәk hәm ona mühәvvәl olmuşdu. Şüai şәbih büsatına dair mükalimәlәr yazıb, mәrsiyәlәr inşa etmişdir vә bunlardan әlavә bir kitab hürufi-heça qafiyәsindә tәlif edib, öz hәyatında birinci dәfә çap etdiribdir. Çifayda, o kitabı әlә gәtirmәk bizә mәqdur olmadı. Mirzә Kәrim Şüai türk vә fars dillәrinә dara, fәsih bir şәxs olduğuna [binaәn], bu dillәrdә onun әşarü kәlamları vardır.

Şüai vәfat edibdir tarixi-miladın 1894-cü sәnәsindә Dәrbәnd şәhәrindә. Onun böyük oğlu Mәhәmmәdәli nam Badkubәdә qulluq edir vә ikinci oğlu Şәhriyar bәy Dәrbәndin uyezdni xәzinәsindә çinovnikdir.