ADMİU-da Sabirin 150 illiyi qeyd edildi

Aprelin 25-də Mədəniyyət və İncəsənət Universitetində dahi şairimiz Mirzə Ələkbər Sabirin anadan olmasının 150 illiyinə həsr olunmuş “Sabir və Azərbaycan gülüş mədəniyyəti” adlı elmi-nəzəri konfrans keçirildi. Konfransı giriş sözü ilə universitetin prorektoru, professor Rafiq Sadıqov açdı. O, Azərbaycan Respublikasının Prezidenti İlham Əliyevin sərəncamına əsasən 2012-ci ildə Azərbaycan tənqidi realizminin banilərindən biri, böyük satirik M.Ə.Sabirin anadan olmasının 150 illik yubileyi təntənələrinin əhəmiyyətindən danışdı. Bütünlükdə Sabiri milli poeziyamızın rəmzi simvolu adlandıran natiq, Vaqif sadəliyi, Mirzə Cəlil demokratizmi, Füzuli psixologizmi, Nizami epizminin Sabirdə vəhdət halında təcəssüm etdiyini söylədi.

Konfransda dahi şairin misilsiz istedadını şərtləndirən incə məqamlar, onu dünya satirik şerində ən uca mövqeyə çıxaran səbəblərlə əlaqədar çox maraqlı məruzələr dinlənildi. ADMİU-nun “Sənətşünaslıq” fakültəsinin professoru, filoloji elmlər doktoru Gülşən Əliyeva, professor Aydın Abıyev, kulturologiya üzrə fəlsəfə doktoru Fatimat Məmmədova və görkəmli Sabirşünas alim, BDU-nun professoru Alxan Bayramoğlu fitrətən milli şair olan Sabirin bütün yaradıcılığı boyu xalqının ictimai-sosial və psixoloji dərdlərini son dərəcə dəqiq, orijinal boyalarla qələmə aldığını qeyd etdilər.

525-ci qəzet.- 2011.- 27 aprel.- S.7.