Gözəl insan, gözəl ana, gözəl pedaqoq

Fatma Balakişi qızı İsgəndərova 1936-cı il noyabr ayının 20-də Zəngəzur mahalının, Sisiyan rayonunun Urud kəndində zəhmətkeş ailədə dünyaya göz açıb. İlk 7 illik təhsilini doğma kəndində aldıqdan sonra, təhsilini davam etdirmək üçün Vağadi kənd orta məktəbində təhsilini davam etdirib. Orta Məktəbi əla qiymətlərlə başa vuran Fatma müəllimə, Zəngəzur mahalından 500 km uzaqlara Bakıya gəlmiş və 1955-ci ildə o zamanki V.İ.Lenin adına Pedaqoji İnstitutunun filologiya-tarix fakülitəsinə daxil olmuşdur. Və inistitutu yaxşı qiymətlərlə bitirən bu nəcib insan 1961ci ildən 1975-ci ilə qədər Corat qəsəbəsindəki 7 saylı, 1975-2011-ci ilə qədər isə Sumaqyıtdakı 25 saylı orta məktəbdə dərs keçib. Öz biliyini sevə-sevə şagirdlərinə aşılayan bu nurani müəllimə dəfələrlə fəxri fərmanlar və diplomlarla təltif olunmuş, 2006-cı ildə isə 70 illik yubileyi ərəfəsində “Qabaqcıl Maarif İşçisi” döş nişanına layiq görülmüşdür.

Fatma müəlliməni Sumqayıtda tanımayan insan yoxdur. Çünki, bu xanım sözün həqiqi mənasında son 50 ildir ki, Sumqayıtın cəmiyyətini formalaşdıran bir xanımdır. Belə ki, alimindən, fəhləsinə kimi böyük əksəriyyət (saya gəlməyəcək qədər) Fatma müəllimənin yetişdirmələri olub. Onu şəxsən tanımayanlar isə qiyabi də olsa tanıyırlar və birmənalı olaraq bu böyük həyat təcrübəsi olan insanla təmas qurmaq istəyində olublar. Ona görə birmənalı deyirəm ki, Fatma müəllimənin böyük mənada dərs verdiyi yüzminlərlə şagirdlərindən biri də mən olmuşam. Və bu müəlliməni çox gözəl tanıyıram. Çünki Fatma müəllimə mənim həm müəlliməm, həm də sinif rəhbərim olub. Buna da əminəm ki, həmin o yüzminlərlə şagirdlərdən kimlər ki, bir başa böyük təhsil işçisinin sinifində oxumayıblar, onlar da təəssüflərini gizlədə bilməzlər. Ona görə ki, hər kəs onun sinifində oxumaq istərdi. Bu baxımdan mən özümü şanslı hesab edə bilərəm.

Bir neçə gün öncə yenidən gözəl müəlliməmə, böyük ürək sahibi ilə yenidən görüşmək qərarına gəldim. Bu görüş mənim üçün əvvəlkilərdən fərqli idi. Çünki, Fatma müəllimə artıq sonsuz vurğunu olduğu peşəsindən ayrılmışdı.

Elə ilk olaraq da peşəsindən ayrılarkən hansı hissləri keçirdiyini soruşduqda gözəl pedaqoqun verdiyi cavab çox qəribə oldu. Belə ki, onun üçün sevdiyi peşəsindən ayrılarkən çalışdığı 25 saylı məktəbin onun şərəfinə düzənlədiyi vida mərasiminə də qatılmayıb. Hətta bu kəlmələri danışarkən Fatma müəllimənin nə qədər üzüldüyünü və qəhərləndiyini açıq şəkildə sezmək olurdu. Bu da onun bir daha peşəsinə nə qədər bağlı olduğunu və nə qədər böyük ürək sahibi olduğunu göstərir. Gözəl pedaqoq peşəsindən ayrılmağına üzgün olsa da digər tərəfdən onu sevindirən halın olduğunu da vurğuladı. Qocaman müəlliməni sevindirən amil son zamanlar ölkə təhsilində baş verən böyük sıçrayışdır. O, ölkəmiz adına savadlı kadrların yetişdirilməsi üçün Türk dünyasının lideri Heydər Əliyevin, istər sovetlər dönəmində, istərsə də müstəqillik dönəmində təhsilə ayırdığı diqqətdən danışaraq bu gün də bu siyasətin layiqli davamçı və praqmatik dövlət başçısı İlham Əliyev tərəfindən davam etdirilməsini ölkəmizin gələcəyi adına uğur sayır. Eyni zamanda bu il Milli Məclisdə Təhsil haqqında Qanunun qəbulunun vacibliyindən danışaraq təhsilimizin daha da dayanıqlı olduğunu dilə gətirən qocaman müəllimə sovetlər donəmindən fərqli olaraq indi elmə yiyələnmək və böyük intelekt sahibi olmaq üçün daha gözəl şəraitin olduğunu söylədi. İnteraktiv təlim metoduna önəm verən əziz müəlliməm, bütün sahələrdə olduğu kimi, milli təhsil quruculuğu sahəsində də dövlətin apardığı islahatları alqışlayır və bu intibah dövründən hər bir vətəndaşımızın lazımınca yararlanmasını istəyir. O, əlavə etdi ki, indi şagirdlərin istənilən sahəyə yiyələnmələri üçün dövlətimiz tərəfindən geniş imkanlar yaradılıb. İstər dərsliklərin yüksək keyfiyyətli olması, istərsə də təhsil ocaqlarında yaradılan infrastrukturları göstərməklə, müəllimlərin də peşələrinə ciddi yanaşmalarına əsas verir. İstənilən uğura çatmaq üçün xüsusən də gənc müəllim və müəllimələrin öz üzərlərində çalışmalarının vacibliyini vurğulayaraq, Ümummilli lider H.Əliyevin kəlamlarından birini “Öz üzərində işləməyən müəllim, yaxşı müəllim ola bilməz” xatırlatdı.

Özünün təcrübəsindən danışan Fatma müəllimə şagirdlərinə öz övladları kimi yanaşdığını, bütün biliyini onların savadlanması və cəmiyyətimiz üçün layiqli şəxsiyyətlər kimi yetişmələri üçün səylərini əsirgəmədiyini bildirdi. Məhz belə bir qayğının nəticəsidir ki, Fatma müəllimənin bilik verdiyi şagirdlərin çoxu bu gün respublikamızın tanınmış şəxsiyyətləridir. Neçə-neçə alimlər və elimlər namizədlərinə dərs keçən müəlliməm oxumağa meyli olmayan şagirdlərlə də ciddi məşğul olmağın yollarını gənc pedaqoqlara tövsiyə edərək öz praktikasından misal gətirdi. “Oxumayan şagirdlərlə hər dərs gününün sonunda 1 saat ayrıca məşğul olurdum və onlara oxumasalar da belə ən azından hansısa peşəyə sahib olmaları üçün müəyyən tövsiyələr verirdim. Çünki, bildiyiniz kimi cəmiyyətə gedən yol məktəbdən keçir, belə olduğu təqdirdə bizim də əsas borcumuz şagirdlərimizi vətənpərvər ruhda, milli dəyərlərə önəm verərək cəmiyyətə sağlam formada təqdim etməkdən ibarətdir” deyən bu böyük pedaqoq, oxuyan və oxumayanlar arasında fərq qoymadığını dilə gətirdi. Sadəcə olaraq oxumayan şagirdlərlə münasibətdə daha incə, daha həssas olmaq lazımdır deyən Fatma müəllimə onların da sağlam ruhda yetişdirilməsinin vacibliyini vurğuladı. Böyük ziyalı hər zaman dərs verdiyi şagirdlərin yüksək biliyə yiyələnməsi üçün ciddi səylə çalışdığını və bu yolda yorulmadığını dedi. Eyni zamanda müəlliməm Türk dünyasının digər lideri Mustafa Kamal Atatürkün “Heç zaman çalışmayacam ki, mən millətimin səviyyəsinə enim. Çalışacam ki, millətim mənim səviyyəmə çatsın. Çünki, mən təhsil görmüşəm” kəlamını öz praktikasında tətbiq etdiyini və şagirdlərinin özünün səviyyəsinə qalxması üçün bütün bilik və bacarığını ortaya qoyduğunu qürurla dilə gətirdi. Məhz bunun nəticəsidir ki, harada şagirdlərimlə qarşılaşsam böyük ehtiramlarının şahidi oluram dedi.

Tələbəlik illərindən sonra ömrünü gənclik şəhəri Sumqayıta bağlayan Fatma İsgəndərova bu müddət ərzində həm gözəl ana, həm gözəl pedaqoq, həm də gözəl insan kimi onu tanıyan hər kəsin qəlbində xoş izlər buraxa bilmişdir. Fatma müəllimə 50 illik pedaqoji fəaliyyəti dövründə saysız-hesabsız alimlər, elmlər namizədləri, hüquqşünaslar, həkimlər, mühəndislər və s peşə sahibləri yetişdirmişdir. Hər zaman təvazökar, mehriban və səmimiliyilə seçilən bu uca insan işlədiyi həm Corat qəsəbəsindəki 7 saylı məktəbdə, həm də Sumqayıt şəhərindəki 25 saylı məktəbdə istər şagirdləri, istərsə də məktəb kollektivinin sevimlisi olmağı bacarmışdı. O öz gözəl təbiətilə, eyni zamanda xeyirxah əməllərilə daxili zənginliyi özündə yarada bilmiş və örnək olmuşdur.

Ümumiyyətlə, Fatma müəllimənin çoxşaxəli həyat yolu olmuşdur. Üç övlad anası, 7 nəvənin nənəsi, olan Fatma müəllimə eyni zamanda xoşbəxt valideyinlərdəndir. Dünyaya gətirdiyi övladlarının hər 3-ü mükəmməl biliyə yiyələnməklə, dövlətçiliyimizin keşiyində layiqincə durular. Təbii ki, belə olduğu təqdirdə onlar həm də valideyinlərinin fəxridirlər. Məktəbdə şagirdlərə evdə isə övladlarına necə vaxt ayıra bildiyini soruşduqda Fatma müəllimə həyatda qazandığı uğurlara görə həyat yoldaşı Zaman İsgəndərova borclu olduğunu dilə gətirdi. Və qeyd etdi ki, hər zaman istənilən işi görmək istəyəndə ömür-gün yoldaşının dəstəyini hiss edib.

Sonda Görüş zamanı məlum oldu ki, 20 noyabr 2011-ci ildə həm də Ömrünün düz 50 ilini müəllimlik fəaliyyətinə həsr edən bu nəcib peşə sahibinin 75 yaşı tamam olub. Hər zaman olduğu kimi bu dəfə də doğum gününü dəbdəbəsiz yalnız öz ailə üzvülərilə birlikdə qeyd etdiyini dedi. Fatma müəllimə onu da əlavə etdi ki, artıq 20 ildir doğum günü məlum 20 noyabr faciəsilə əlaqədar olaraq bir neçə gün ya əvvələ, ya da arxaya keçirirlər.

P.S. Fatma müəllimənin söylədiyi sonuncu söz, bir daha əsas verir ki, bu insanın nə qədər vətəninə millətinə bağlı olduğunu söyləyəsən. Sonda gecikmiş də olsa, Fatma müəlliməni şəxsən öz adımdan, o cümlədən dərs dediyi 100 minlərlə şagird ordusu adından, bir sözlə bu gözəl insanı sevən hər kəsin adından qəzet vasitəsilə təbrik edir, Ona uzun ömür, sağlam can və firavan həyat arzulayıram.

Doğum günün mübarək, Böyük Müəllim!

Elçin ABDULLAYEV

525-ci qəzet.- 2011.- 22 noyabr.-S.8.