Bu gün Azərbaycan Ordusu Azərbaycan torpaqlarında düşmənə sarsıdıcı zərbələr
endirir. Bu gün Azərbaycan Ordusu öz torpağında Azərbaycanın ərazi bütövlüyünü
qoruyur, müdafiə edir.
Biz haqq yolundayıq. Bizim işimiz haqq işidir. Biz zəfər çalacağıq! Qarabağ
bizimdir, Qarabağ Azərbaycandır!
Televiziya vasitəsilə xalqa müraciətindən,
27 sentyabr 2020
Bu gün Cəbrayıl şəhəri və Cəbrayıl rayonunun doqquz kəndi işğaldan azad edildi.
Bu tarixi hadisə münasibətilə bütün Azərbaycan xalqını ürəkdən təbrik edirəm.
Biz haqq-ədalət tərəfindəyik. Biz tarixin ən şərəfli anlarını yaşayırıq.
Azərbaycan xalqı qə¬dim xalqdır. Bizim tariximizdə bir çox şərəfli anlar olub,
hadisələr olub, qələbələr olub. Onların sırasında bugünkü hadisələr xüsusi
yerdədir. Biz ədaləti bərpa edirik, ərazi bütövlüyümüzü bərpa edirik, Azərbaycan
xalqının ümidlərini doğrulduruq və bundan sonra da doğruldacağıq. Biz haqlıyıq,
biz zəfər çalacağıq! Qarabağ bizimdir, Qarabağ Azərbaycandır!
Televiziya vasitəsilə xalqa müraciətindən,
04 oktyabr 2020
Bu gün Azərbaycan Ordusu Füzuli şəhərini və bir neçə kəndi işğaldan azad edib.
Füzuli bizimdir! Füzuli Azərbaycandır! Biz Füzuliyə qayıtmışıq!”
Televiziya vasitəsilə xalqa müraciətindən,
17 oktyabr 2020
Əziz həmvətənlər, müzəffər Azərbaycan Ordusu döyüş meydanında yeni qələbələr
qazanır. Bu qələbələr hər bir Azərbaycan vətəndaşını sevindirir. Torpaqlarımızı
30 ilə yaxın işğal altında saxlayan düşmən döyüş meydanında Azərbaycan Ordusunun
gücünü görür. Biz öz torpağımızda vuruşuruq, öz torpağımızı qoruyuruq və
işğalçıları bundan sonra da öz torpaqlarımızdan qovacağıq.
Zəngilan rayonu. Şanlı Azərbaycan Ordusu Zəngilan rayonu ərazisinə də daxil olub,
girib və yaşayış məntəqələrinin azad olunması təmin edilib. Zəngilan rayonu
ərazisində yerləşən yaşayış məntəqələrinin adlarını çəkirəm: Havalı kəndi,
Zərnəli kəndi, Məmmədbəyli kəndi, Həkəri kəndi, Şərifan kəndi, Muğanlı kəndi və
Zəngilan şəhəri! Zəngilan bizimdir! Qarabağ bizimdir!
Əziz xalqım, əziz zəngilanlılar, füzulilər, xocavəndlilər, cəbrayıllılar və
işğal edilmiş digər rayonların sakinləri, biz öz missiyamızı yerinə yetiririk.
Düşmənə layiqli cavab veririk. Düşməni cəzalandırırıq. Düşmən bizim qarşımızda
acizdir. Düşmənin belini qırırıq, qıracağıq!
Qarabağ bizimdir! Yaşasın Azərbaycan! Eşq olsun Azərbaycan xalqına!
Televiziya vasitəsilə xalqa müraciətindən,
20 oktyabr 2020
Bu gün Azərbaycan Ordusu Zəngilan, Cəbrayıl, Qubadlı rayonlarının bir neçə
kəndini və Qubadlı şəhərini işğalçılardan azad etmişdir. Eşq olsun Azərbaycan
Ordusuna! Qarabağ Azərbaycandır!
Rəsmi tvitter hesabından paylaşımı,
25 oktyabr 2020
Biz əsgərlərimizin, zabitlərimizin canı-qanı bahasına bu torpaqları azad edirik.
Həm döyüş meydanında, həm siyasi müstəvidə özümüzü təsdiqləmişik, dünyaya
təsdiqləmişik. Azərbaycan xalqını qürurlu xalq kimi, cəsarətli xalq kimi,
yenilməz xalq kimi təsdiqləmişik. Heç bir təzyiq bizə təsir edə bilməz. Heç bir
hədə-qorxu bizi yolumuzdan döndərə bilməz. Çünki haqq yolundayıq, yumruq kimi
birik. Bu birlik əbədidir və əbədi olacaq!
Televiziya vasitəsilə xalqa müraciətindən,
26 oktyabr 2020
Böyük fəxarət və qürur hissi ilə bəyan edirəm ki, Şuşa şəhəri işğaldan azad
edildi! Şuşa bizimdir! Qarabağ bizimdir! Bu münasibətlə bütün Azərbaycan xalqını
ürəkdən təbrik edirəm. Bütün şuşalıları ürəkdən təbrik edirəm.
İyirmi səkkiz il yarım işğal altında olan Şuşa azad edildi! Şuşa indi azaddır!
Biz Şuşaya qayıtmışıq! Biz bu tarixi Qələbəni döyüş meydanında qazandıq. 2020-ci
il noyabrın 8-i Azərbaycan tarixində əbədi qalacaqdır. Bu tarix əbədi yaşayacaq.
Bu, bizim şanlı Qələbəmizin, zəfərimizin günüdür!
Əziz Şuşa, sən azadsan!
Əziz Şuşa, biz qayıtmışıq!
Əziz Şuşa, biz səni dirçəldəcəyik!
Şuşa bizimdir! Qarabağ bizimdir! Qarabağ Azərbaycandır!
Şəhidlər xiyabanında xalqa müraciətindən,
08 noyabr 2020
Bu gün ölkəmiz üçün tarixi bir gündür. Bu gün Ermənistan-Azərbaycan Dağlıq
Qarabağ münaqişəsinə son qoyulur.
Biz bu qələbəni döyüş meydanında qazandıq. 300-ə yaxın yaşayış məntəqəsi, o
cümlədən Füzuli şəhəri, Cəbrayıl şəhəri, Zəngilan şəhəri, Qubadlı şəhəri, Şuşa
şəhəri, Hadrud qəsəbəsi, Suqovuşan qəsəbəsi, digər qəsəbələr döyüş meydanında
azad edildi.
“Qarabağ Azərbaycandır və nida” ifadəsi artıq bizim qələbəmizin rəmzi idi,
rəmzinə çevrildi. Bir il bundan əvvəl mən bunu demişəm. Mən fəxr edirəm ki,
mənim dediyim ifadə artıq bir milli şüara çevrildi. Bu gün böyük qürur hissi ilə
deyə bilərik ki, Füzuli bizimdir, Cəbrayıl bizimdir, Zəngilan bizimdir, Qubadlı
bizimdir, Ağdam bizimdir, Laçın bizimdir, Kəlbəcər bizimdir, Şuşa bizimdir,
Qarabağ bizimdir, Qarabağ Azərbaycandır! Eşq olsun Azərbaycan xalqına! Yaşasın
Azərbaycan!
Televiziya vasitəsilə xalqa müraciətindən,
10 noyabr 2020
Füzuli şəhəri işğalçılardan azad edilib. Füzuli şəhərində Azərbaycan bayrağı
qaldırılıb. Biz Füzuliyə qayıtmışıq.
Bizim bütün hərbçilərimiz, Füzuli və işğaldan azad edilmiş başqa torpaqlarda
yaşamış sakinlər bilməlidirlər ki, biz bütün bu yerləri bərpa edəcəyik. Mən
demişdim, Füzulidə bir dənə də bina tapılmadı ki, orada Azərbaycan bayrağı
ucaldılsın. Amma biz bərpa edəcəyik.
Mənfur düşmən Füzulinin adını da dəyişdirib, bir eybəcər ad qoyubdur. Füzuli
bizim dahi, böyük şairimiz Məhəmməd Füzulinin adını daşıyır. Biz bu adı bərpa
etmişik. Dağıdılmış Füzuli şəhəri erməni faşizminin canlı şahididir. Bütün dünya
bunu görməlidir və səssiz qalmamalıdır.
Füzuli və Cəbrayıl rayonlarındakı çıxışından,
16 noyabr 2020
Mən sizi Ağdam rayonunun işğaldan azad olunması münasibətilə ürəkdən təbrik
edirəm. Bütün ağdamlıları ürəkdən təbrik edirəm. Əziz ağdamlılar, siz artıq
köçkün deyilsiniz. Siz doğma dədə-baba torpağınıza qayıdacaqsınız.
Televiziya vasitəsilə xalqa müraciətindən,
20 noyabr 2020
Biz informasiya müharibəsində qələbə qazandıq. Biz Xocalı soyqırımı haqqında
dünyaya dolğun məlumat verdik. Xocalı soyqırımı haqqında dünyada məlumat yox idi.
“Xocalıya ədalət!” kampaniyası, 10-dan çox ölkə tərəfindən Xocalı soyqırımının
soyqırımı kimi tanınması demək olar ki, münaqişə ilə bağlı həqiqəti əks etdirən
mənzərəni yaratdı və dünya ictimaiyyətinə çatdırdı.
Bu gün tarixi bir gündür. Biz şanlı Qələbəmizi qeyd edirik. Dağılmış Ağdam
şəhəri erməni vəhşiliyinin şahididir. Biz Ağdam şəhərini bərpa edəcəyik, bütün
kəndləri bərpa edəcəyik. Heç kimdə bu haqda şübhə olmasın. Bu, böyük iş
olacaqdır. Əlbəttə ki, böyük zəhmət tələb edəcək. Amma necə ki, biz 44 gün
ərzində birlik göstərmişik, əminəm ki, azad edilmiş torpaqlarımızın bərpası
işində də birlik, əzmkarlıq göstərəcəyik. Bütün şəhərlərimizi bərpa edəcəyik,
daha da gözəl şəhərlər olacaqdır. Şəhərlərimizdə qalan tarixi abidələri bərpa
edəcəyik və bir daha gücümüzü göstərəcəyik.
Biz Qələbəmizi dəmir yumruq hesabına, düşməni qova-qova qazanmışıq və indi
durmuşuq öz torpağımızda.
Eşq olsun Azərbaycan xalqına! Eşq olsun Azərbaycan əsgərinə, Azərbaycan zabitinə!
Ağdam bizimdir! Qarabağ Azərbaycandır!
Ağdam şəhərindəki çıxışından,
23 noyabr 2020
Əziz həmvətənlər. Bu gün Kəlbəcər rayonu işğaldan azad olundu. Bu münasibətlə
bütün Azərbaycan xalqını ürəkdən təbrik edirəm.
Əziz kəlbəcərlilər, gözünüz aydın olsun! Doğma rayonunuz işğaldan azad olundu.
Bu günü Azərbaycan xalqı uzun illər ərzində səbirsizliklə gözləyirdi.
Kəlbəcər bizim qədim torpağımızdır. Qədim Azərbaycan torpağıdır. Kəlbəcər ərazi
baxımından bizim ən böyük rayonlarımızdan biridir. Kəlbəcərin tarixi abidələri
bizim böyük sərvətimizdir. Həm məscidlər, həm kilsələr bizim tarixi
sərvətimizdir. Azərbaycan xalqı onu yaxşı bilir və bütün dünya bilməlidir ki,
Kəlbəcərdə mövcud olan kilsələr qədim Qafqaz Albaniyası dövlətinə məxsusdur.
Bunu təsdiqləyən bir çox tarixi sənədlər var.
Televiziya vasitəsilə xalqa müraciətindən,
25 noyabr 2020
Böyük sevinc hissi ilə bildirirəm ki, Laçın rayonu işğaldan azad olundu. Bütün
Azərbaycan xalqını bu münasibətlə ürəkdən təbrik edirəm. Laçın rayonunun
işğaldan azad olunması tarixi hadisədir. Özü də bir güllə atmadan biz Laçın
rayonunu qaytardıq. Düşməni buna məcbur etdik. Döyüş meydanında əldə edilmiş
parlaq qələbə bu gözəl nəticəyə gətirib çıxardı ki, üç rayonumuz – Ağdam,
Kəlbəcər və Laçın bizə qaytarıldı. Biz bu rayonları bir güllə atmadan, bir şəhid
vermədən qaytarmışıq.
Xalqa müraciətindən,
1 dekabr 2020
Qubadlıya öz sahibləri qayıdıb. Qubadlının işğaldan azad edilməsi tarixi hadisə
idi. Oktyabrın 25-də Qubadlı şəhərinin azad edilməsi bizim qələbəmizi
yaxınlaşdırdı.
Dekabrın 10-da Zəfər paradı keçirildi. Zəfər paradında biz düşmənin məhv edilmiş
və qənimət götürülmüş texnikasını nümayiş etdirdik və öz hərbi potensialımızı
nümayiş etdirdik. Biz bundan sonra da ordumuzu gücləndirəcəyik.
Biz Qələbə qazanmışıq, düşməni torpaqlarımızdan qovmuşuq. Amma heç kim təminat
verə bilməz ki, bir neçə ildən sonra erməni faşizmi yenə baş qaldırmasın. Ona
görə Azərbaycan dövləti həmişə güclü olmalıdır. Azərbaycan dövlətinin həmişə
güclü ordusu olmalıdır. Biz gücümüzü bilirik. Dünya da bizim gücümüzü bilir.
Azərbaycan tarixdə heç vaxt belə parlaq Zəfər əldə etməmişdir, tarixdə heç vaxt
indiki qədər güclü olmamışdır. Bizim gücümüz birliyimizdədir. Biz birlik nümayiş
etdirmişik, əzmkarlıq nümayiş etdirmişik, qəhrəmanlıq nümayiş etdirmişik və
bunun nəticəsində dəmir yumruqla düşmənin başını əzib öz doğma torpaqlarımızı
azad etmişik. Qarabağ Azərbaycandır! Yaşasın Azərbaycan əsgəri! Yaşasın
Azərbaycan!
Qubadlı və Zəngilan rayonlarındakı çıxışından,
23 dekabr 2020
Müharibə bizim gücümüzü göstərdi, əyilməz iradəmizi göstərdi, birliyimizi
göstərdi, müharibə rəmzinə, qələbə rəmzinə çevrilən dəmir yumruq öz gücünü
göstərdi. Bu, həm birlikdir, həm gücdür. Cəmiyyətimizdə birlik də var, ölkəmizin
gücü də var və həmişə olacaq.
Televiziya vasitəsilə xalqa müraciətindən,
1 yanvar 2021
Azərbaycan dövləti özünün ən şanlı dövrünü yaşayır. Çünki Azərbaycan tarixdə heç
vaxt bu qədər güclü olmamışdır. Bu gün bu, həm siyasi gücdür, iqtisadi gücdür,
xalq-iqtidar birliyidir, hərbi gücdür və bizim regionda oynadığımız müsbət
roldur. Biz bu gücdən istifadə edərək qarşımızda duran əsas vəzifəni şərəflə
yerinə yetirdik.
2020-ci ilin yekunlarına həsr olunmuş videoformatda müşavirədəki
çıxışından,
06 yanvar 2021
Ordumuz Şuşaya qədər qələbə yolu ilə, uğurla gedərək Cəbrayıl, Füzuli, Xocavənd
rayonlarını, Suqovuşan, Hadrut qəsəbələrini, Murovdağ silsiləsini, Laçın
rayonunun cənub hissəsini, Qubadlı, Zəngilan rayonlarını azad edib və noyabrın
8-də Şuşa şəhərini azad edib.
Şuşa şəhərində səfərdəki çıxışından,
14 yanvar 2021
Noyabrın 8-də qədim Şuşa şəhərimizi düşməndən azad edərək Azərbaycan parlaq
qələbə qazandı. Şuşanın işğaldan azad edilməsi böyük qəhrəmanlıq, peşəkarlıq,
milli ruh tələb edirdi. Azərbaycan hərbçiləri bütün bu ülvi xüsusiyyətləri
nümayiş etdirmişdir. Mən Şuşaya Qələbə yolu ilə gəlmişəm.
Dahi şəxsiyyətlərimizin büstləri bizim Qələbəmizin rəmzidir. Onların ruhu şaddır.
Onlar doğma Vətənə qayıdıblar. Biz qaytarmışıq onları, düşməni qova-qova,
düşməni məhv edərək, torpaqlarımızdan rədd edərək, Şuşanı geri alaraq, azad
edərək qaytarmışıq. Burada duracaq, Şuşaya gələn hər bir insan yaxından görəcək
erməni vəhşiliyini.
Tarixi ədalət bərpa olunur. Biz tarixi ədaləti bərpa edirik - güc hesabına, əzm,
iradə hesabına, cəsarət, mətanət hesabına, milli ruh hesabına! Natəvan, Üzeyir
bəy, Bülbül milli ruhumuzun təcəssümüdür. Onların əziz xatirəsi bizim qəlbimizdə
əbədi yaşayıb və əbədi yaşayacaqdır. Qarabağ Azərbaycandır!
Bura Cıdır düzüdür. Hər birimiz üçün əziz, doğma Cıdır düzü. Şuşanı Cıdır
düzüsüz təsəvvür etmək mümkün deyil, Azərbaycanı isə Şuşasız təsəvvür etmək
mümkün deyil. Biz Şuşaya qayıtmışıq, Cıdır düzünə qayıtmışıq və tarixi yerdə
bundan sonra muğam səsi eşidiləcək, Azərbaycan mahnıları ifa olunacaq, böyük
tədbirlər keçiriləcək, toy-bayram olacaq.
Şuşa şəhərində səfərdəki çıxışından,
15 Yanvar 2021
Biz qaytarmışıq bu torpaqları, qayıtmışıq. Bax, durmuşam burada - Laçın
rayonunda. Bu torpaqları düşməndən azad edən Müzəffər Ordunun Ali Baş Komandanı
kimi Azərbaycan bayrağını qaldırmışam və bu bayrağın altında Azərbaycan xalqına
doğma Laçın diyarından müraciət edirəm. Bizim Qələbəmiz tarixi Qələbədir. Biz
tarixi ədaləti bərpa etdik. Biz öz haqlarımızı bərpa etdik, biz şəhidlərimizin
qanını aldıq, biz düşməndən qisas aldıq və qayıtmışıq. İndi isə bərpa işləri
gedir və gedəcək. Mən demişəm, biz bu bölgəni - Qarabağı cənnətə çevirəcəyik.
Artıq bütün göstərişlər verilib. Bütün işlər görülür, planlı şəkildə görüləcək
və biz bundan sonra bu torpaqlarda əbədi yaşayacağıq. Heç kim bizi bundan sonra
bu torpaqlardan tərpədə bilməz. Qarabağ bizimdir! Qarabağ Azərbaycandır!
Laçın rayonundakı çıxışından,
14 fevral 2021
Zəngilan coğrafi nöqteyi-nəzərdən Şərqi Zəngəzur bölgəsinə aiddir və Şərqi
Zəngəzurda yerləşir. Qərbi Zəngəzur da bizim tarixi torpaqlarımızdır və o
torpaqlardan Zəngəzur dəhlizi keçəcəkdir. Beləliklə, Azərbaycanın əsas hissəsi
Naxçıvan Muxtar Respublikası ilə dəmir yolu vasitəsilə birləşəcək.
Zəngilan rayonundakı çıxışından,
26 aprel 2021
Biz bu günü 30 il səbirsizliklə gözləmişik, 30 il Vətən həsrəti ilə yaşamışıq.
30 il ədalətsizliklə barışmalı olurduq, amma barışmırdıq və hər dəfə deyirdik ki,
bu vəziyyətlə biz heç vaxt barışmayacağıq, nəyin bahasına olursa-olsun öz doğma
torpaqlarımızı işğalçılardan azad edəcəyik və bunu etdik. Uzun fasilədən sonra
bu il birinci dəfə keçirilən “Xarıbülbül” musiqi festivalı şəhidlərimizin əziz
xatirəsinə həsr olunub. Biz bu günü bizim qəhrəman hərbçilərimizə borcluyuq,
Azərbaycan xalqına borcluyuq. Xalq birləşdi, xalq həmrəylik göstərdi, bir yumruq
kimi birləşdi və bu Qələbəni Azərbaycan xalqı qazandı. Bu, bizim hamımızın
qələbəsidir.
Şuşa Azərbaycan xalqının milli sərvətidir. Bu yaxınlarda Şuşanın Azərbaycanın
mədəniyyət paytaxtı elan edilməsi bunu bir daha göstərir. Şuşa qədim Azərbaycan
şəhəridir.
Bu gün Cıdır düzündə Azərbaycan muğamı səslənəcək. Uzun fasilədən sonra biz
Şuşada bu gözəl musiqi bayramını qeyd edəcəyik. Bu gün, sözün əsl mənasında,
musiqi bayramıdır.
Biz 8 noyabrda Şuşaya döyüşərək, vuruşaraq, qan tökərək qayıtmışıq. Ancaq bu gün
Azərbaycan mədəniyyəti, Azərbaycan mədəniyyətinin görkəmli nümayəndələri Şuşaya
qayıdıblar və bu qayıdış reallıqdır, bu reallıqla hər kəs hesablaşmalıdır.
“Xarıbülbül” festivalının açılışındakı çıxışından,
12 may 2021
Biz müstəqilliyimizin möhkəmlənməsi istiqamətində çox böyük işlər görmüşük.
Siyasi cəhətdən tam müstəqilik. Heç bir ölkə bizim iradəmizə təsir edə bilməz və
bunu artıq hər kəs bilir ki, Azərbaycanla hesablaşmaq lazımdır, Azərbaycanın
mövqeyini nəzərə almaq lazımdır. Azərbaycan özünə hörmət edən dövlətdir və hər
kəsdən bu hörməti tələb edir və bunu əldə edir.
Zəngilanın təbiəti o qədər gözəldir ki, biz təbiətə bir zərrə ziyan vurmamalıyıq,
əksinə, təbiəti daha da zənginləşdirməliyik, xüsusilə nəzərə alsaq ki, ermənilər
Bəsitçay təbii qoruğunu da məhv etmişlər. O məşhur palıd ağaclarını da kəsmişlər,
Oxçuçayı da zəhərləmişlər. Vejnəlidə də bizim qızıl yataqlarımızı istismar
edərkən heç bir ekoloji normaya riayət etməmişlər.
Zəngilan rayonunda “Ağıllı kənd” layihəsinin birinci mərhələsi üzrə açılış
mərasimindədəki çıxışından,
27 may 2022
Kəlbəcər faydalı qazıntı yataqları, səfalı təbiəti ilə yanaşı, İstisu mineral
ehtiyatı və “İstisu” sanatoriyası ilə də məşhurdur. Erməni vandalları
ərazilərimizi işğal etdikdən sonra oradakı təbii ehtiyatları da istismar ediblər.
İndi “İstisu”ya öz əvvəlki şöhrətini qaytarmaq qarşıda duran vəzifələrdən
biridir.
Kəlbəcər və Laçın rayonlarındakı çıxışından,
16 avqust 2021
Şuşa Azərbaycan şəhəridir. Şuşanın təməlini, - hamımız yaxşı bilirik, - 1752-ci
ildə Pənahəli xan qoymuşdur və gələn il biz Şuşanın 270-ci ildönümünü təntənəli
şəkildə qeyd edəcəyik. İşğala baxmayaraq, Şuşa Azərbaycan ruhunu saxlaya bildi.
Şuşaya gələn hər bir insan bunu görür. Hətta dağılmış vəziyyətdə, hətta işğal
dövründə vandalizmə məruz qalmış şəkildə Şuşa öz ruhunu, öz qamətini saxlaya
bildi, əyilmədi, sınmadı, bizi gözləyirdi, biz gəlməli idik və biz gəldik.
Müzəffər xalq kimi gəldik. Danışıqlar yolu ilə yox, Ermənistan tərəfindən edilə
biləcək hansısa güzəşt nəticəsində yox, döyüş meydanında qan tökərək, şəhidlər
verərək, fədakarlıq göstərərək gəldik, öz ərazi bütövlüyümüzü bərpa etdik və
milli ləyaqətimizi bərpa etdik.
Şuşada Vaqif Poeziya Günlərinin açılışındakı çıxışından,
30 avqust 2021
İkinci Qarabağ müharibəsi bizim şanlı tariximizdir. Bu Qələbə tarixdə əbədi
qalacaq. Azərbaycan Silahlı Qüvvələri 44 gün ərzində düşmən ordusunu məhv edərək
öz ərazi bütövlüyünü bərpa etdi.
Biz bundan sonra qalib ölkə, müzəffər xalq kimi yaşayacağıq və azad edilmiş
torpaqları quracağıq, bərpa edəcəyik. O torpaqlara artıq həyat qayıdır, insanlar
qayıdır. Bu qayıdışı ən qısa müddət ərzində təmin etmək bu gün bizim başlıca
vəzifəmizdir.
Biz Birinci Qarabağ müharibəsindəki məğlubiyyətlə barışmadıq, güc topladıq,
bütün gücləri səfərbər etdik, ordumuzu gücləndirdik, ölkə iqtisadiyyatını
gücləndirdik, ölkəmizin nüfuzunu qaldırdıq və öz tarixi missiyamızı şərəflə
yerinə yetirdik. Biz düşməni torpaqlarımızdan qovduq və ədaləti, beynəlxalq
hüququ bərpa etdik. Biz milli ləyaqətimizi bərpa etdik. Bu gün Azərbaycan xalqı
müzəffər xalq kimi yaşayır. Bu gün Azərbaycan dövləti qalib dövlət kimi yaşayır.
Biz bundan sonra müzəffər xalq və qalib dövlət kimi əbədi yaşayacağıq.
Müharibə dövründə hamımız bir şüarla yaşayırdıq – öldü var, döndü yoxdur.
Azərbaycan xalqı Azərbaycan Ordusunun arxasında möhkəm dayanaraq ordumuza əlavə
güc verirdi.
Anım Günü ilə əlaqədar xalqa müraciətindəki çıxışından,
27 sentyabr 2021
Bu gün Suqovuşanda və Talış kəndində olarkən bir daha xalqımızın, Silahlı
Qüvvələrimizin qəhrəmanlığını görürəm. Buraya gələn hər kəs bunu görür və
görəcək. Çünki bu yerləri işğaldan azad etmək, ölümə getmək, bax, xalqımızın
böyüklüyünü göstərir.
Tərtər rayonunun Suqovuşan qəsəbəsindəki çıxışından,
04 oktyabr 2021
Biz hərbçilərimizlə haqlı olaraq fəxr edirik və fəxr edəcəyik. Onlar əsl
qəhrəmandırlar. Biz bütün xalqımızla fəxr edirik. Çünki bu 44 gün ərzində
göstərilən həmrəylik, göstərilən birlik bütün dünyaya Azərbaycan xalqını çox
ləyaqətli və böyük xalq kimi təqdim etdi. Bizim Qələbəmizin rəmzi olan yumruq
təkcə güc rəmzi deyil, bu, birlik rəmzidir. Biz birləşdik və istədiyimizə nail
olduq, tarixi ədaləti bərpa etdik.
Biz müharibəni Zəfərlə başa vurduq. İndi sülh dövrünü də zəfərlə başlamışıq,
zəfərlə başa vuracağıq.
Cəbrayıl rayon ictimaiyyətinin nümayəndələri ilə görüşündəki çıxışından,
05 oktyabr 2021
Füzuliyə həyat qayıdır və qayıdacaq. Əminəm ki, maksimum qısa müddət ərzində
Füzuli şəhəri də, rayonun kəndləri də çiçəklənəcək. Biz azad edilmiş ərazilərdə
ən müasir texnologiyaları tətbiq edirik. Bu, artıq reallıqdır. Bunu mən müharibə
başa çatandan dərhal sonra bəyan etmişdim və bunu bu gün hər kəs görə bilir.
Füzuli Beynəlxalq Hava Limanı Qarabağın hava qapısıdır.
Füzuli rayon ictimaiyyətinin nümayəndələri ilə görüşündəki çıxışından,
8 oktyabr 2021
Biz uzun fasilədən sonra Hadruta - Xocavəndə qayıtmışıq. Döyüşərək, qan tökərək,
şəhidlər verərək qayıtmışıq. Allah bütün şəhidlərimizə rəhmət eləsin, onların
qanı, canı bahasına, hərbçilərimizin şücaəti, qəhrəmanlığı hesabına biz tarixi
ədaləti bərpa etdik, işğalçıları doğma torpaqlarımızdan qovduq və doğma
torpaqlarımıza qayıtdıq. Bu gün artıq Hadrutun və ümumiyyətlə Qarabağın yeni
dövrü başlayır.
Xocavənd rayon ictimaiyyətinin nümayəndələri ilə görüşündəki çıxışından,
10 oktyabr 2021
Bizim uğurlu əməliyyatlarımız məhz Füzuli rayonundan başlamışdır. Müharibənin
ilk günündə - sentyabrın 27-də Füzulinin Qaraxanbəyli, Qərvənd, Kənd Horadiz,
Yuxarı Əbdürrəhmanlı kəndləri və Cəbrayılın Böyük Mərcanlı və Nüzgar kəndləri
azad edildi. Yəni, biz öz Zəfər missiyamızı məhz Füzuli rayonundan başlamışıq.
Füzuli rayon ictimaiyyətinin nümayəndələri ilə görüşündəki çıxışından,
17 oktyabr 2021
Oktyabrın 18-də Azərbaycan Silahlı Qüvvələri Xudafərin körpüsünə çıxdı və
Xudafərin körpüsü üzərində Azərbaycan bayrağını qaldırdı. Xudafərin körpüsü
Azərbaycan xalqının milli sərvətidir, Azərbaycan xalqının istedadının sübutudur.
Biz Azərbaycan xalqına məxsus olan bu möhtəşəm memarlıq əsəri ilə haqlı olaraq
fəxr edirik.
Füzuli rayon ictimaiyyətinin nümayəndələri ilə görüşündəki çıxışından,
18 oktyabr 2021
Mən bu gün Qubadlı rayon sakinlərini Qubadlıya dəvət etmişəm. Qubadlıya xoş
gəlmisiniz. Bu gün Qubadlı rayonunun tarixində əlamətdar və tarixi bir gündür.
Düz bir il bundan əvvəl müzəffər Azərbaycan Ordusu Qubadlını erməni işğalından
azad etmişdir və bundan sonra 25 oktyabr bizim tariximizdə əbədi Zəfər günü kimi
qeyd ediləcək. Bu münasibətlə sizi və bütün qubadlıları, bütün Azərbaycan
xalqını ürəkdən təbrik etmək istəyirəm.
25 Oktyabr – Zəfər günü, Qubadlının azad olunması günüdür. 27 ildən sonra biz
işğala son qoyduq, düşməni öz torpağımızdan qovduq. Müzəffər Azərbaycan Ordusu
öz şərəfli missiyasını şərəflə yerinə yetirdi. İkinci Qarabağ müharibəsi bizim
gücümüzü göstərdi və milli ruhumuzu göstərdi. Göstərdi ki, biz heç vaxt o
vəziyyətlə barışmaq fikrində deyildik. Əgər qubadlılılar digər keçmiş köçkünlər
kimi, hər il böyük ürəkağrısı ilə işğal günündə yığışırdılarsa, bundan sonra
artıq o tarix tamamilə silindi, ancaq 25 oktyabrda hamımız bayram edəcəyik. Sizi
bir daha təbrik edirəm.
Qubadlı rayon ictimaiyyətinin nümayəndələri ilə görüşündəki çıxışından,
25 oktyabr 2021
Hadrut əməliyyatı İkinci Qarabağ müharibəsində xüsusi əhəmiyyətə malik olan bir
əməliyyat idi. İlk növbədə ona görə ki, bu strateji qəsəbəni işğaldan azad etmək
bizim gələcək planlarımıza əlavə dəstək verdi. Çünki əgər biz Hadrutu
işğalçılardan azad etməsəydik, gələcək əməliyyatlarımız daha böyük çətinliklərlə
üzləşə bilərdi.
Xocavənd rayonunun Hadrut qəsəbəsinə səfəri zamanı çıxışından,
24 dekabr 2021
Bu gün bu gözəl mənzərəli yerlərə baxdıqca bir daha görürəm, diyarımız nə qədər
gözəldir, dağlarımız nə qədər əzəmətlidir. Bütün bu tarixi gözəlliyə biz
gözəllik qatacağıq, zövq qatacağıq və burada azərbaycanlılar rahat yaşayacaqlar,
sülh, əmin-amanlıq, təhlükəsizlik şəraitində yaşayacaqlar. Sülhün və
təhlükəsizliyin təminatçısı Azərbaycan dövlətidir və Azərbaycan Silahlı
Qüvvələridir.
Tərtər rayonunun Suqovuşan qəsəbəsində Novruz bayramı
münasibətilə Azərbaycan xalqına təbrikindəki çıxışından,
20 mart 2022
Şuşada keçirilən qurultayın çox böyük tarixi mənası var. Bu gün Azərbaycan yeni
dövrə qədəm qoyub. Biz otuz il torpaqları işğal edilmiş ölkə kimi yaşamışıq. Bu,
bizim üçün çox ağır idi. Mənim üçün Prezident kimi, hər bir vətəndaş üçün, sizin
üçün – xaricdə yaşayan azərbaycanlılar üçün. Biz bilirdik ki, bu məğlubiyyətin
heç bir real əsası olmamışdır. Sadəcə olaraq, 1990-cı illərin əvvəllərində
Azərbaycanda baş vermiş hadisələr - hakimiyyət uğrunda gedən müharibə, milli
xəyanət, satqınlıq və digər bəd əməllər, bax, bu vəziyyəti yaratmışdır. Biz
bilirdik ki, bu Qələbəyə layiqik. Bir daha demək istəyirəm, - çıxışımın
əvvəlində mən bunu dedim, - mənim üçün Prezident kimi başlıca vəzifəm ölkəmizi
gücləndirmək və ərazi bütövlüyümüzü bərpa etmək idi.
Şuşa şəhərində Dünya Azərbaycanlılarının V Qurultayındakı çıxışından,
22 aprel 2022
Şuşa Zəfərimizin rəmzidir, Şuşa Zəfərimizin tacıdır. Şuşa işğaldan azad olunanda,
bax, bu meydanda qəhrəman Azərbaycan hərbçiləri mənə Şuşanın azad olunması ilə
bağlı raport vermişlər. Bu binanın damında Azərbaycan Bayrağı qaldırılmışdır və
Şuşanın azad olunması bizim tarixi Zəfərimizin əsas hissəsi idi.
Biz - bu torpaqların sahibləri artıq qayıtmışıq və bu torpaq, bu səma bunu görür.
Görür ki, hər gün inkişafla bağlı daha bir addım atılır. Hər gün daş üstə bir
daş qoyulur. Biz azad edilmiş bütün torpaqları bərpa edəcəyik, bərpa edirik.
Biz bu torpaqlara, doğma torpaqlarımıza əbədi qayıtmışıq və burada əbədi
yaşayacağıq.
Şuşa şəhərlərinə səfəri zamanı çıxışından,
10 may 2022
Bu gün Silahlı Qüvvələrimizlə fəxr edə bilərik. Bu gün biz müzəffər xalq kimi,
qalib ölkə kimi Ordu Gününü qeyd edirik. İşğal illəri dövründə hərbçilərlə
çoxsaylı görüşlərdə - hərbi hissələrdə, səngərlərdə, Lələtəpə zirvəsində, hərbi
paradlarda hər zaman deyirdim ki, gün gələcək biz öz doğma torpaqlarımızı
qaytaracağıq.
Bu gün Ordu Gününü Kəlbəcərdə qeyd etməklə biz hamımız qürur hissi keçiririk.
Biz bu gün qalib insanlar kimi yaşayırıq. Bütün dünya azərbaycanlıları
yaşadıqları yerlərdə başlarını dik tutub qalib xalqın nümayəndələri kimi
yaşayırlar. Biz tarix qarşısında, əcdadlarımızın ruhu qarşısında və gələcək
nəsillər qarşısında tarixi missiyanı icra etdik. Bu tarixi Qələbə daim bizim
tariximizdə olacaq. Biz daim bu tarixi Qələbə ilə fəxr edəcəyik.
Kəlbəcər rayonunda hərbi hissənin açılışındakı çıxışından,
27 iyun 2022
Mən bir daha demək istəyirəm ki, bizi heç kim və heç nə dayandıra bilməz. Biz
haqqın, ədalətin, beynəlxalq hüququn tərəfdarıyıq və öz ərazi bütövlüyümüzü
qoruyuruq, qorumuşuq, bərpa etmişik. Bütün dünyaya göstərə bilmişik ki, nəyə
qadirik, torpaqlarımızı güc yolu ilə azad etmişik və bununla fəxr edirik. Bütün
Azərbaycan xalqı, bütün dünya azərbaycanlıları bununla fəxr edir. Biz
şəhidlərimizlə, Ordumuzla, hərbçilərimizlə fəxr edirik və bu gün burada
dalğalanan üçrəngli Bayrağımız bizim Zəfərimizin rəmzidir.
Cəmi 44 gün ərzində Ermənistan ordusunu darmadağın etdik. Alınmaz qala sayılan
Şuşanı azad etdik. Cəbrayılı, Füzulini, Zəngilanı, Qubadlını, Hadrutu, Xocavəndi
döyüş meydanında azad etdik. Düşmən diz çökdü və Laçını, Kəlbəcəri, Ağdamı tərk
etməyə məcbur oldu. Bu gün Laçın şəhərində olarkən haqlı olaraq qürur hissi
keçirirəm ki, qədim Azərbaycan torpağında bizim üçrəngli Bayrağımız dalğalanır.
Bir daha demək istəyirəm, fəxr edirəm ki, Laçın şəhərinin mərkəzində milli
bayrağımızı ucaltdım. Bu bayraq burada əbədi dalğalanacaq! Biz burada əbədi
yaşayacağıq! Yaşasın Laçın! Yaşasın Azərbaycan!
Laçın şəhərinin azad edilməsi həmişə tarixdə qalacaq. Bu gün Laçın şəhərində,
şəhərin mərkəzində, mərkəzi küçədə Azərbaycan Bayrağını qaldırmışam. Bu bayraq
burada əbədi dalğalanacaqdır.
Cəmi 44 gün ərzində Ermənistan ordusunu darmadağın etdik. Alınmaz qala sayılan
Şuşanı azad etdik. Cəbrayılı, Füzulini, Zəngilanı, Qubadlını, Hadrutu, Xocavəndi
döyüş meydanında azad etdik. Düşmən diz çökdü və Laçını, Kəlbəcəri, Ağdamı tərk
etməyə məcbur oldu. Bu gün Laçın şəhərində olarkən haqlı olaraq qürur hissi
keçirirəm ki, qədim Azərbaycan torpağında bizim üçrəngli Bayrağımız dalğalanır.
26 avqust tarixində Laçın şəhəri ilə birlikdə Zabux və Sus kəndləri də
işğalçılardan azad edilmişdir. Yəni, bütün bu tarixi biz heç vaxt unutmamalıyıq.
Biz şəhidlərimizin canı, qanı bahasına, qəhrəman əsgər və zabitlərimizin
fədakarlığı sayəsində bu gün bu torpaqlardayıq. Heç kim bu torpaqları bizə
bağışlamayıb, heç kim bu torpaqları bizə danışıqlar yolu ilə qaytarmayıb.
Laçın şəhərinə səfəri zamanı çıxışından,
21 sentyabr 2022
44 günlük Vətən müharibəsi şanlı tariximizdir. Azərbaycan xalqı bütün gücünü
səfərbər edib yumruq kimi birləşərək düşməni doğma torpaqlarımızdan qovdu. Bütün
Azərbaycan xalqı birlik, iradə göstərmişdir. Qəhrəman əsgər və zabitlərimizin
fədakarlığı, qəhrəmanlığı sayəsində bu gün biz azad edilmiş torpaqlarda qurub-yaradırıq,
şəhərlərimizi, kəndlərimizi bərpa edirik və həm də şanlı Zəfərimizlə fəxr edirik.
Eyni zamanda, fəxr edirik ki, biz - bu torpaqların sahibləri bu torpaqlara
yenidən həyatı qaytarırıq.
Bu gün şəhidlərimizin əziz xatirəsini yad edərək, bir daha hər birimiz özünə söz
verməlidir, vəd verməlidir, and içməlidir ki, biz müstəqilliyimizin keşiyində
əbədi duracağıq, biz ərazi bütövlüyümüzün keşiyində əbədi duracağıq.
Qoymayacağıq ki, bir daha düşmən başını qaldırsın, qoymayacağıq ki, bir daha
bizim üçün təhdid yaratsın. Əgər bunu görsək, dərhal hərəkətə keçəcəyik. Əminəm
ki, buna ehtiyac olmayacaq. Çünki ölkəmizin artan gücü, o cümlədən hərbi gücü
müstəqilliyimizin, rahat həyatımızın təminatçısıdır, onun qarantıdır.
Füzuli rayonuna səfəri zamanı çıxışından,
27 sentyabr 2022
Alınmaz qala sayılan Şuşanı iki il bundan əvvəl erməni işğalından azad edən
Azərbaycan Silahlı Qüvvələri şanlı tarix yazdı. Bu şanlı tarix bizimlə əbədi
olacaq. Azərbaycan xalqı, gələcək nəsillər bu şanlı Qələbə ilə haqlı olaraq fəxr
edəcəklər.
Şuşa həqiqətən alınmaz qala sayılırdı. Şuşanı yüngül silahlarla təchiz edilmiş
qəhrəman hərbçilərimiz azad edəndə onlar ölümə gedirdilər. Vətən uğrunda, torpaq
uğrunda ölümə gedirdilər. Hər birimiz yaxşı anlayırdıq ki, Şuşasız bizim tam
qələbəmiz mümkün olmayacaq.
Zəfər Günü münasibətilə Şuşada təşkil olunan tədbirdəki çıxışından,
08 noyabr 2022
Laçının azad olunmasının və bu gün bizim burada keçirdiyimiz görüşün
tarixlərinin də rəmzi mənası var. May ayında Laçın işğal altına düşdü, may
ayında laçınlılar Laçına qayıtdılar. Düzdür, 31 ildən sonra, amma biz qayıtmışıq.
Laçın şəhərinə qayıdan əhali ilə görüşündəki çıxışından,
28 may 2023
Biz bu gün azad Qarabağda, azad Şuşada Dünya Azərbaycanlılarının Qurultayını
keçiririk. Bu qurultayın adı Zəfər qurultayıdır və bu, təbiidir. Çünki tarixi
Zəfərdən sonra ilk dəfədir ki, dünya azərbaycanlıları toplaşır, qurultay keçirir
və ümumiyyətlə Zəfər adı xalqımıza çox yaraşır. Siz buraya Zəfər yolu ilə
gəlmisiniz, qurultayın adı Zəfər qurultayıdır. Hazırda ölkəmizin müxtəlif
yerlərində, ilk növbədə, azad edilmiş ərazilərdə Zəfər muzeyləri inşa edilir.
Şuşa rəsmi olaraq Azərbaycanın mədəniyyət paytaxtıdır, eyni zamanda, Şuşa bizim
Qələbəmizin rəmzidir, sülhün rəmzidir. Çünki Şuşa azad olunduqdan sonra İkinci
Qarabağ müharibəsi başa çatdı. Siz buraya gələrkən azad olunmuş ərazilərdən
keçdiniz. Siz Füzuli Hava Limanından Şuşaya elə bir yolla gəlmisiniz ki, biz onu
Zəfər yolu adlandırmışıq. Bu yol nə sovet dövründə, nə də ki, işğal dövründə
mövcud deyildi. Bu yol bizim qəhrəmanlarımızın cəsarəti və ruhu sayəsində
açılıbdır. Biz buraya məhz bu şəkildə gəlmişik, şəhərlərimizi və kəndlərimizi
azad edə-edə gəlmişik. Bu şəhər həm də bizim cəsarətimizin rəmzidir. Şuşada
artıq bir neçə beynəlxalq tədbir keçirilibdir. Bu şəhərdə “Xarıbülbül”
Beynəlxalq Musiqi Festivalı, Vaqif Poeziya Günləri, bir neçə beynəlxalq idman
tədbiri keçirilib və nəhayət bu gün Qlobal Media Forumu keçirilir. Yəni, bu
şəhər öz kimliyini qoruya bilmişdir. Baxmayaraq ki, işğal dövründə o, məqsədli
şəkildə, qəsdən dağıdılmışdır.
Şuşa Qlobal Media Forumundakı çıxışından,
21 iyul 2023
Biz Zəngilanı mühüm nəqliyyat qovşağı hesab edirik, çünki onun coğrafi mövqeyi
bunu labüd edir. Zəngilan nəqliyyat dəhlizləri üzərində yerləşir və ona görə
Zəngilan Beynəlxalq Hava Limanının inşası da bu bölgənin inkişafı baxımından
mühüm faktor olmuşdur. O, insanlar üçün asan çıxışı təmin edəcəkdir. Gələcəkdə
isə, əminəm ki, Zəngilanda xarici turistlərin sayı çox olacaqdır. Çünki bu bölgə
Azərbaycanın ən gözəl guşələrindəndir. Meşələri, çayları, gölləri və misilsiz
ekosistemi olan Zəngilan bizim ən böyük sərvətimizdən biridir. Əminəm ki, vaxt
keçdikcə bu, turistlər tərəfindən ən çox sevilən bölgə olacaq.
Zəngilanda II Azərbaycan Milli Şəhərsalma Forumundakı çıxışından,
29 sentyabr 2023
Azərbaycan xalqı uzun illər ərzində işğal dövründə bir nöqtəyə vururdu ki,
tezliklə bizim torpaqlarımız işğalçılardan azad edilsin. Biz bu müqəddəs günü
hər gün, hər saat öz əməyimizlə, işimizlə yaxınlaşdırırdıq.
Mən bu 20 il ərzində heç vaxt şübhə etmirdim ki, bu gün gələcək və Xankəndi
şəhərində Azərbaycan Bayrağı altında hərbi parad keçiriləcək.
Xankəndi şəhərində Vətən müharibəsində əldə edilən Zəfərin üçüncü
ildönümünə həsr olunan hərbi parad zamanı çıxışından,
08 noyabr 2023
Vətən müharibəsində Azərbaycanda yaşayan bütün xalqların böyük payı vardır.
Vətən müharibəsi bir daha onu göstərdi ki, Azərbaycanda bütün xalqlar dostluq,
qardaşlıq, həmrəylik şəraitində yaşayır və bu 44 günlük müharibə bir daha onu
göstərdi ki, ölkəmizdə milli birlik, milli həmrəylik vardır. Təsadüfi deyil ki,
birinci festivalda Azərbaycanda yaşayan xalqların nümayəndələri çıxış edəcəklər
və bir daha biz bütün dünyaya buradan – Şuşadan, qədim torpağımızdan mesaj
veririk. Ölkələr belə inkişaf etməlidir, ancaq çoxkonfessiyalı, çoxmillətli
ölkələrdə, cəmiyyətlərdə inkişaf olur, birlik olur, milli həmrəylik olur, sülh
olur.
Şuşa Azərbaycanın bir çox dahi mədəniyyət xadimlərinin vətənidir. Şuşada
doğulmuş, burada boya-başa çatmış görkəmli və dahi mədəniyyət xadimləri bizim
qürur mənbəyimizdir. Şuşa nəinki Azərbaycanda, bütövlükdə Qafqaz bölgəsində və
daha böyük coğrafiyada tarixən mədəniyyət ocağı kimi tanınırdı. Şuşanın
mədəniyyət xadimlərinin fəaliyyəti hər zaman böyük diqqət cəlb edirdi.
Şuşada VII “Xarıbülbül” Beynəlxalq Musiqi Festivalının və “Şuşa – İslam
dünyasının mədəniyyət paytaxtı 2024” ilinin açılış mərasimindəki çıxışından
11 may 2024
Bura bizim tarixi torpağımızdır və əminəm ki, bunu Azərbaycanda bilməyən yoxdur,
dünyada da bunu bilirlər ki, Xankəndi şəhəri qədim Azərbaycan yaşayış yeri
olubdur, onun adı onu göstərir - Xanın kəndi.
2020-ci ilin noyabrından 2023-cü ilin sentyabrına qədər bizim bütün
addımlarımızı və gördüyümüz işləri təhlil etsəniz görərsiniz ki, hər bir addım
əvvəlki addımın məntiqi davamı idi və hər bir addımın son məqsədi 20 Sentyabr -
Dövlət Suverenliyi Günü idi.
Qarabağ Universitetinin təmirdən sonra açılışındakı çıxışından,
20 sentyabr 2024
Cəbrayılın azad olunmasının çox böyük əhəmiyyəti vardır. Çünki İkinci Qarabağ
müharibəsi dövründə işğalçılardan azad edilmiş birinci şəhər idi. O vaxta qədər
artıq müharibə bir həftə idi ki, gedirdi və 20-yə yaxın kənd azad edilmişdi, o
cümlədən Cəbrayıl rayonunun kəndləri. Ancaq şəhər olaraq birinci şəhər Cəbrayıl
olmuşdur və Cəbrayıl əməliyyatı xüsusi əhəmiyyətə malik idi.
Bu gün Cəbrayıl şəhərinin azad olunmasının dördüncü ildönümüdür. Bu münasibətlə
sizi, bütün cəbrayıllıları, bütün Azərbaycan xalqını ürəkdən təbrik edirəm. Bu
gözəl hadisəni biz dörd il sonra bu gün Cəbrayılda qeyd edirik. Bildiyiniz kimi,
mənim Sərəncamımla 4 Oktyabr - Cəbrayıl Şəhəri Günü elan edilmişdir. Əminəm ki,
bundan sonra biz hər il bu gözəl günü qeyd edəcəyik.
Cəbrayıl şəhərində inşa olunan yaşayış kompleksinin açılışındakı
çıxışından
04 oktyabr 2024
Qırx dörd gün ərzində Azərbaycan Silahlı Qüvvələri ancaq və ancaq irəli gedirdi.
Hər gün, hər saat irəli gedərək döyüş meydanında 300-dən çox şəhər və kəndimizi
işğalçılardan azad etdik və düşməni kapitulyasiya aktının imzalanmasına məcbur
etdik. Qırx dörd gün ərzində şəhərlərimizin, kəndlərimizin azad edilməsi
Ordumuzun gücünü, hərbçilərimizin peşəkarlığını, fədakarlığını, xalqımızın
əzmini bütün dünyaya nümayiş etdirmişdir.
Bakıda Zəfər parkının açılışındakı çıxıçından,
08 noyabr 2024
İşğal dövründə - 30 il ərzində biz hər gün bu müqəddəs azadlıq gününü
yaxınlaşdırırdıq. Hər birimiz öz iş yerində vahid amal uğrunda birləşərək,
azadlıq üçün, azadlıq müharibəsi üçün yorulmadan çalışırdıq. Bütün cəmiyyət bir
amal uğrunda birləşəndə o cəmiyyət böyük işlərə qadirdir. Heç bir qüvvə xalq
qarşısında dura bilməz. Xalqımızın böyüklüyü məhz bundadır.
Biz 44 gün ərzində hər gün irəli gedirdik, hər gün itkilər verirdik, şəhidlər
verdik. Allah bütün şəhidlərimizə rəhmət eləsin! Hər gün yeni uğurlar əldə
edirdik, hər gün hansısa kəndləri azad edirdik. Bu, bizə əlavə ruh verirdi,
əlavə güc verirdi. Xalqımız tam birləşdi. Bu, mənə Ali Baş Komandan kimi əlavə
mənəvi ruh verirdi. Bu, bizim hamımızın Qələbəsidir. Azərbaycan xalqı bu
Qələbəni əldə etməklə öz tarixi böyüklüyünü bütün dünyaya nümayiş etdirdi.
Təsadüfi deyil ki, Azərbaycana dünyada olan münasibət, - hətta bizə düşmənçilik
edən dairələr, qüvvələr, ölkələr bilirlər ki, biz ləyaqətli xalqıq, hörmətə
layiq olan xalqıq və bizimlə hesablaşmaq lazımdır. Ən azı yaşadığımız bölgədə
bizimlə bu gün hesablaşmayan sabah peşman olur.
Biz müzəffər xalqıq, qalib xalqıq. Öz torpağımızda yaşayırıq. Bir daha sübut
etdik ki, bu torpaqların sahibi bizik, çünki biz dağıdan yox, qurub-yaradanıq və
bundan sonra da bu torpaqlarda əbədi yaşayacağıq.
Yaşasın Ağdam, yaşasın Azərbaycan!
Ağdam Muğam Mərkəzinin açılışındakı çıxışından,
10 may 2025
Azərbaycan dövləti və xalqı bu ədalətsizliklə, bu işğalla heç vaxt barışmayıb.
Biz güc toplayırdıq, beynəlxalq müstəvidə daha güclü mövqelərə sahib olurduq.
Beynəlxalq təşkilatlar çərçivəsində öz haqq işimizi aparırdıq. Bütün aparıcı
beynəlxalq təşkilatlar Azərbaycanın ərazi bütövlüyünü tanımaqla münaqişənin
həlli üçün siyasi və hüquqi zəmin yaratmışdır. Biz, eyni zamanda, güclü
iqtisadiyyat qurmuşuq və məhz bunun nəticəsində ordu quruculuğuna lazımi həcmdə
vəsait ayırmışıq. Güclü siyasi iradə, güclü iqtisadiyyat və güclü ordu
faktorları bizi Qələbəyə aparan amillərdir.
2020-ci il noyabrın 8-də Şuşa Zəfərimizdən sonra Ermənistan ordusunda
təslimçilik meyilləri daha da artdı və ondan bir gün sonra - noyabrın 9-dan
10-na keçən gecə Ermənistan kapitulyasiya aktını, təslim aktını imzalamağa
məcbur oldu. Məhz bunun nəticəsində bir güllə atılmadan Laçın, Kəlbəcər və Ağdam
işğalçılardan azad edilmişdir.
30 il ərzində işğal altında qalan Laçın şəhərində bizim birgə olmağımız böyük
rəmzi məna daşıyır. Çünki 44 günlük İkinci Qarabağ müharibəsi zamanı bizi
Türkiyə və Pakistan dəstəkləmişdir.
Laçında 28 May - Müstəqillik Gününə həsr olunmuş konsertdəki çıxışından
28 may 2025
Bizim gücümüz, xalqımızın iqtidarla bir yerdə olması, hərbi Zəfərimiz,
cəmiyyətdəki ovqat, vətənpərvərlik ruhu - bütün bu amillər bütün dünyaya
göstərdi ki, hər kəs bizimlə hesablaşmalıdır və bizimlə hesablaşmayan nəticədə
peşman olur.
Kəlbəcər şəhərinin sakinləri ilə görüşündəki çıxışından,
21 avqust 2025
8 Noyabr - Zəfər Günü bizim tariximizdə olan ən parlaq səhifədir. Beş il bundan
əvvəl tarixi Zəfərimiz bütün dünyaya səs salıb.
Cəbrayıl rayonunun Horovlu kəndində sakinlərlə görüşündəki çıxışından,
28 oktyabr 2025
