2 Fevral - Gənclər Günü 1997-ci ildən etibarən ölkəmizdə
gənclər siyasətinə verilmiş yüksək dəyərin təzahürü olaraq, təntənəli
şəkildə qeyd edilir. Ulu Öndər Heydər Əliyevin imzaladığı müvafiq
Sərəncamla MDB məkanında və Şərqi Avropa ölkələri arasında ilk dəfə
ölkəmizdə gənclər üçün xüsusi bir gün təsis olunub. Gənclərə verilən
önəmin bariz nümunəsi olaraq ölkəmiz bu sahədə də dünyanın bir çox
ölkəsini qabaqlayıb. Azərbaycanda Gənclər Günü təsis edildikdən xeyli
sonra gənclərin işləri üzrə nazirlərin ümumdünya konfransının (8-12
avqust 1998-ci il) tövsiyəsi əsasında BMT Baş Məclisinin 1999-cu il 17
dekabr tarixli qətnaməsi ilə 12 Avqust - Beynəlxalq Gənclər Günü elan
edilib.
Ulu Öndər Heydər Əliyev hələ ötən əsrin 70-80-ci illərində yüzlərlə
azərbaycanlı gənci keçmiş SSRİ-nin aparıcı ali məktəblərinə göndərir və
orada müxtəlif ixtisaslar üzrə təhsil almalarına şərait yaradırdı.
1970-ci ildə Heydər Əliyevin təşəbbüsü ilə 1500-dən artıq azərbaycanlı
gənc keçmiş ittifaqın aparıcı ali təhsil olacaqlarına göndərilməklə,
onların bütün təminatlarının dövlət tərəfindən həyata keçirilməsinə nail
olmuşdu. Ulu Öndər 1982-ci ildə Azərbaycanda rəhbərlikdən getdikdən
sonra da azərbaycanlı gənclərin təhsilini ön planda saxlamışdı.
Bu fikirləri açıqlamasında Milli Məclis sədrinin müavini Adil Əliyev
bildirib.
O qeyd edib ki, Heydər Əliyev 1993-cü ildə xalqın istək və arzusu ilə
siyasi hakimiyyətə qayıtdıqdan sonra bütün sahələrdə olduğu kimi,
gənclər və idman sahəsində də mükəmməl dövlət siyasətinin əsasını qoydu.
Sabitliyi təmin etməklə yanaşı, Ulu Öndər gənclərin yetişdirilməsinə
xüsusi diqqət ayırırdı. Gənclər siyasətinin həyata keçirilməsi
istiqamətində sistemli işin aparılması məqsədilə ilk addım olaraq Heydər
Əliyevin imzaladığı 1994-cü il 26 iyul tarixli Fərmanla ölkəmizdə
Gənclər və İdman Nazirliyi yaradıldı. Nazirliyin yaradılmasında əsas
məqsəd qısa vaxtda gənclər siyasətinin əsas konturlarını
müəyyənləşdirmək idi.
İkinci addım 1995-ci ildə Gənclər Təşkilatlarının Milli Şurasının
yaradılması oldu. Bunun davamı kimi cəmiyyətin inkişafında və müxtəlif
problemlərin həllində gənclərin rolunu artırmaq, onların ölkənin gələcək
inkişafında iştirakını və məsuliyyətini yüksəltmək məqsədilə Ümummilli
Lider Heydər Əliyev tərəfindən 1995-ci ildə Azərbaycan Gənclərinin
Forumunun keçirilməsi təşəbbüsü irəli sürüldü və 1996-cı il fevralın 2-də
gənclərin I Forumu keçirildi. Məhz 2 Fevral daha sonra Gənclər Günü
olaraq xalqımızın tarixinə düşdü.
Üçüncü addım gənclər sahəsində dövlət siyasətinin uğurla həyata
keçirilməsi məqsədilə bu sahənin zəruri qanunvericilik bazasının
formalaşdırılması oldu.
Heydər Əliyevin müəyyənləşdirdiyi gənclər siyasətinin bu gün uğurla
davam etdirildiyini deyən Adil Əliyev əlavə edib: “Bu siyasətin
sayəsində Azərbaycan idmanı və gənclər sektoru böyük tərəqqiyə nail olub.
Azərbaycanda gənclər sahəsində tədbirlər kompleks şəkildə hazırlanır və
həyata keçirilir. Bunun nəticəsində ölkədə gənclərlə iş sahəsində ciddi
keyfiyyət dəyişiklikləri əldə edilib, gənclərin ictimai həyatda rolu
önəmli dərəcədə artıb. Ölkəmizdə müntəzəm olaraq keçirilən böyük idman
yarışları, idmançılarımızın beynəlxalq turnirlərdə əldə etdiyi çoxsaylı
qələbələr bu sahədə əldə edilmiş tərəqqinin bariz təzahürləridir. Onu da
qeyd etmək istərdim ki, hər il Azərbaycanda martın 5-i bədən tərbiyəsi
və idman günü kimi qeyd olunur. Bu faktın özü bir tərəfdən simvolik məna
daşıyır, digər tərəfdən isə idman və bədən tərbiyəsinin Azərbaycanda
həyat tərzi kimi qavranıldığını göstərir.
Azərbaycan gəncliyi ilə bağlı dövlət proqramları, gənclərin inkişaf
strategiyası, eləcə də xaricdə təhsillə bağlı müxtəlif dövlət
proqramları qəbul edilərək, uğurla icra edilir. Bu sırada "2007-2015-ci
illərdə Azərbaycan gənclərinin xarici ölkələrdə təhsili üzrə Dövlət
Proqramı", habelə "2019-2023-cü illər üçün Azərbaycan Respublikasında
ali təhsil sisteminin beynəlxalq rəqabətliliyinin artırılması üzrə
Dövlət Proqramı"nı qeyd etmək olar. Bu proqramlar nəticəsində minlərlə
Azərbaycan gənci dünyanın nüfuzlu ali məktəblərində dövlət hesabına
təhsil alır, savadlı kadr kimi yetişirlər. Təhsildən sonra isə gənc
kadrlar müvafiq işlərə qəbul olunur və "Yüksəliş" kimi müsabiqələr
nəticəsində vəzifələrə təyinat alırlar.
Hazırda “2015-2025-ci illərdə Azərbaycan gənclərinin İnkişaf
Strategiyası”nda qarşıya qoyulmuş vəzifələr uğurla icra olunur. Bütün
bunların nəticəsində ölkəmizdə gənclərlə iş sahəsində ciddi keyfiyyət
dəyişiklikləri əldə edilib, onların ictimai həyatda rolu önəmli dərəcədə
artıb.
“Gənclərin xarici ölkələrin nüfuzlu ali təhsil müəssisələrində təhsil
almalarına dair 2022-2026-cı illər üçün Dövlət Proqramı" da hazırda
uğurla icra edilir. Hər il 10 nəfər gəncə fərdi təqaüd verilir.
Gənclərin ictimai həyatda iştirakını təmin etmək məqsədilə gənclər
mərkəzləri, gənclər evləri, olimpiya idman mərkəzləri fəaliyyət göstərir”.
Adil Əliyev qeyd edib ki, gənclərimizin son illərdə idman sahəsində və
beynəlxalq yarışlarda qazandığı uğurlar da göz qarşısındadır. Bu
uğurların təməli də dövlətin gənclər siyasəti ilə bağlıdır.
Təhsil siyasətinin əsas hədəflərindən biri gənc nəsillərin savadlı və
vətənpərvər ruhda yetişməsidir. Neft kapitalının insan kapitalına
çevrilməsi siyasəti buna nümunədir. Sadə dildə desək, Azərbaycanın
enerji resurslarından əldə edilən qazancın önəmli hissəsi təhsilin
keyfiyyətinin yüksəlməsinə yönəldilir. Dövlət büdcəsində təhsil xərcləri
ildən-ilə artırılır.
Məlumdur ki, təhsilin əsası orta məktəblərdə qoyulur. Yüksək təhsil üçün
məktəblər müasir tələblərə cavab verməlidir. Azərbaycanda təhsilin
keyfiyyətinin yaxşılaşdırılması və beynəlxalq standartlara
uyğunlaşdırılması üçün dövlət tərəfindən maliyyələşdirilən müxtəlif
layihələr həyata keçirilir. Bu baxımdan Heydər Əliyev Fondunun
prezidenti Mehriban xanım Əliyevanın təşəbbüsü ilə fond tərəfindən
2005-ci ildən etibarən həyata keçirilən "Yeniləşən Azərbaycana yeni
məktəb" layihəsi xüsusi əhəmiyyətə malikdir. Layihə çərçivəsində ölkə
miqyasında çoxsaylı yeni məktəblər inşa edilərək və ya əsaslı şəkildə
təmir edilərək məktəblilərin istifadəsinə verilib və bu iş hazırda da
davam etdirilir.
Gənclərin də dövlətin onlar üçün yaratdığı imkanlardan səmərəli istifadə
etdiyini vurğulayan A.Əliyev deyib: “Azərbaycan gəncliyi istər Vətən
müharibəsində, istərsə də ondan sonrakı dövrdə üzərinə düşən tarixi
vəzifələrin öhdəsindən layiqincə gəlib. Vətən müharibəsinin əsas
hərəkətverici qüvvəsi gənclər olub. Vətən müharibəsindəki Qələbəmiz həm
də gənclərlə bağlı aparılan uğurlu siyasətin nəticəsi idi.
Ermənistandan fərqli olaraq Azərbaycan Ordusu bütün müharibə dövründə
müharibə qanunlarına əməl edərək özünü ləyaqətlə apardı. Eləcə də,
2023-cü il sentyabrın 19-20-də həyata keçirilən lokal xarakterli
antiterror tədbirləri zamanı yalnız hərbi təyinatlı obyektlərin hədəfə
alınması, mülki əhaliyə zərər vurulmaması Azərbaycan hərbçisinin yüksək
intellekti və peşəkarlığı ilə bərabər, nəcib tərbiyəsindən də xəbər
verirdi. Azərbaycan başqa cür davrana bilməzdi, çünki bu, ümumiyyətlə,
Azərbaycan xalqının xarakterinə ziddir.
Yüksəktəhsilli gənc nəslin yetişməsi Azərbaycan həqiqətlərinin, o
cümlədən Qarabağ müharibəsi ilə bağlı mövqeyimizin dünyaya çatdırılması,
habelə ölkəmizin beynəlxalq səviyyədə yumşaq gücünün formalaşması üçün
zəruridir. Savadlı gənclərimiz Azərbaycan həqiqətlərinin,
torpaqlarımızın azad edilməsi və suverenliyimizin bərpası ilə bağlı
mövqeyimizin dünyaya çatdırılmasında da əhəmiyyətli rol oynayırlar”.
Adil Əliyev
Milli Məclisin deputatı,
Gənclər və idman komitəsinin sədri
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>
>